Jio̍k hûi-á 搙瓷仔

Kap pêng-iú sio chhōe lâi-khì jio̍k hûi-á, siūⁿ-bē-kàu hiah-nī hó-sńg.

佮朋友相揣來去搙瓷仔，想袂到遐爾好耍。

Lāu-su chhoân chiok ché kang-kū hō͘ gún lāi lī-iōng. Thó͘ tio̍h-ài seng siak ho͘ chap, géng ho͘ pêⁿ koh pêng-kun, koh-lâi tio̍h-ài iōng sok-ka khah-phìⁿ kā thó͘ lāi-bīn ê khong-khì khau chhut-lâi.

老師攢足濟工具予阮來利用。土著愛先摔乎紮，研乎平閣平均，閣來著愛用塑膠卡片共土內面的空氣剾出來。

Soah lāi, chio̍h-ko bô͘ chhāi teh tiong-iong, iân bô͘-á ê gōa-hêng kā thó͘ koah chéng-chê. Hái-mî ùn chúi sè-jī kā pôaⁿ-á-tûn boah hō͘ sūn-sūn khah bē sio ê sî pit–khui.

煞來，石膏模祀咧中央，沿模仔的外形共土割整齊。海綿搵水細膩共盤仔唇抹乎順順較袂燒的時必開。

Chún-pī hó liáu-āu thó͘ ē-kha ōaⁿ chò tōa phìⁿ hái-mî, chhut-la̍t ap-bó͘ kah beh ài ê chhim-tō͘ liáu-āu kā thó͘ péng bīn, pôaⁿ-á té hiòng téng-bīn. Hái-mî ùn tâm kā pit-hûn boah hō͘ sūn.

準備好了後土下跤換做大片海綿，出力壓模甲欲愛的深度了後共土反面，盤仔底向頂面。海綿搵澹共必痕抹乎順。

Góa leh pôaⁿ-á-té iōng chhiám-á khek miâ, ngiáu chhut-lâi ê thó͘ tio̍h-ài liâu-liâu-á póe-khui. Koh péng-bīn chi̍t-pái tio̍h hó lāi oe̍h hoe.

我咧盤仔底用攕仔刻名，擽出來的土著愛聊聊仔掰開。閣反面一擺著好來劃花。

Góa kap gún bó͘ ê tô͘ tī kúi kang chêng tio̍h leh thó-lūn, góa siōng-bé koat-tēng beh oe̍h chi̍t tùi tāi-piáu gún ê tōng-bu̍t.

我佮阮某的圖佇幾工前著咧討論，我上尾決定欲劃一對代表阮的動物。

Chi̍t chiah gōng-gōng ê tô-iûⁿ-á sī góa, chi̍t chiah chū-chāi ê niau-á sī i. Lán leh chháu-phí téng sio-siâng kah chhiò bî-bî. Hēng-hok khek leh, chi̍t-sì-lâng ē kì.

一隻戇戇的駝羊仔是我，一隻自在的貓仔是伊。咱咧草疕頂相像甲笑咪咪。幸福刻咧，一世人會記。